நீங்கள் தேடியது "விசாரணை கைதி"

முதுகுளத்தூர்:

ராமநாதபுரம் மாவட்டம், முதுகுளத்தூர் அரசு மருத்துவமனை முதல் தெருவைச் சேர்ந்தவர் மகாதேவன் (வயது 74). இவர் ஓய்வு பெற்ற சுகாதாரத்துறை அதிகாரி ஆவார்.

இவரது வீட்டில் நேற்று முன்தினம் 16 பவுன் நகை, ரூ.13 ஆயிரம், ஏ.டி.எம். கார்டுகள் திருடு போனது. மேலும் ஏ.டி.எம். கார்டுகள் மூலமாக ரூ.1 லட்சத்து 40 ஆயிரம் எடுக்கப்பட்டு இருப்பதும் தெரியவந்தது.

இது குறித்த புகாரின் பேரில் முதுகுளத்தூர் போலீசார் வழக்குப்பதிவு செய்து விசாரணை நடத்தி வந்தனர்.

இந்த திருட்டு வழக்கு தொடர்பாக அதே பகுதியைச் சேர்ந்த மாசிலாமணி மகன் மணிகண்டன் (30) என்பவரை போலீசார் பிடித்துச் சென்றனர். அவரை போலீஸ் நிலையத்தில் வைத்து விசாரணை நடத்தி வந்தனர்.

இந்த நிலையில் விசாரணை கைதி மணிகண்டன் மர்மமான முறையில் போலீஸ் நிலையத்திலேயே இறந்தார்.

அவர் போலீசாரால் அடித்துக் கொல்லப்பட்டாரா? அல்லது மாரடைப்பு ஏற்பட்டு இறந்தாரா? என்பது தெரியவில்லை.

இது குறித்து தகவல் அறிந்ததும் மணிகண்டனின் உறவினர்கள் முதுகுளத்தூர் போலீஸ் நிலையத்துக்கு திரண்டு வந்தனர். ஆனால் போலீசார் அவர்களை உள்ளே விட மறுத்ததுடன் நுழைவுவாயில் கதவை பூட்டினர். மேலும் உறவினர்களிடம் எந்தவித தகவலும் கூற மறுத்துவிட்டனர்.

இறந்த மணிகண்டனின் உடல் பிரேத பரிசோதனைக்காக முதுகுளத்தூர் அரசு ஆஸ்பத்திரிக்கு அனுப்பி வைத்தால் பிரச்சினை ஏற்படும் என்று கருதி பரமக்குடி அரசு ஆஸ்பத்திரிக்கு அனுப்பி வைத்தனர்.

இந்த சம்பவம் குறித்து ராமநாதபுரம் மாவட்ட போலீஸ் சூப்பிரண்டு ஓம்பிரகாஷ் மீனா நேரடி விசாரணை நடத்தினர். மேலும் முதுகுளத்தூர் போலீசாரும் வழக்குப்பதிவு செய்து மணிகண்டனின் மர்மச்சாவு குறித்து விசாரணை நடத்தி வருகிறார்கள்.

இந்த சம்பவம் முதுகுளத்தூரில் இன்று பரபரப்பை ஏற்படுத்தி உள்ளது.

புவனேஸ்வரர்:

ஒடிசா மாநிலம் ஜார்படா சிறப்பு சிறையில் விசாரணை கைதி தூக்கிட்டு தற்கொலை செய்துகொண்ட சம்பவம் பெரும் பரபரப்பை ஏற்படுத்தியுள்ளது.

இதுதொடர்பாக, காவல்துறை அதிகாரி கூறுகையில், பாலியல் வழக்கில் விசாரணை கைதியாக சிறையில் இருந்த ஜிடேந்திர பிஸ்வால், இன்று காலை திடீரென தூக்கிட்டு தற்கொலை செய்துகொண்டதாக தெரிவித்தார்.

மேலும், இச்சம்பவம் தொடர்பான வழக்கு விசாரணை, காவல்துறை உயர் அதிகாரிகள் மூலம் நடத்தப்படும் என டிஜிபி ஷர்மா தெரிவித்துள்ளார். #undertrialprisonerdead #Jharpadajail